27 мамыр күні колледждің жылдық жұмыс жоспарына сәйкес, білім беру қызметтері нарығында оқу орнының бәсекеге қабілеттілігін арттыру мақсатында «Ашық есік» күні ұйымдастырылды. Бұл атаулы күнге облыстық мәслихат депутаты Жалғасхан Донбаев және аудандық мәслихат депутаттары Василий Тен мен Атлана Исаева колледжге арнайы келіп, колледждің тыныс тіршілігімен жақынырақ танысып қайтты. Колледждің директоры Р.Т. Бакировпен оқу кабинеттерін, өндірістік оқыту шеберханаларын, зертханаларды, жатақхананы аралап, өндірістік оқыту шеберлерінің арнайы дайындаған шеберлік сағаттарын тамашалап, оқу орнының жалпы жағдайын көріп, болашақта қолдау көрсетіп, бірқатар мәселерді шешуге көмектесетіндіктерін жеткізді. Шара соңында мәслихат депутаттары студенттермен кездесу ұйымдастырып, мемлекет басшысының «Жаңа Қазақстан: жаңару мен жаңғыру жолы» деген тақырыппен жолдауын талқылады. Нарықта сұранысқа ие мамандықта оқып жатқан студенттерге болашақта өз мамандығының шебері болуға тілектерін білдірді.
